KALIBO, Aklan—Ginareklamo makaron it pilang pumueoyo ro bukon it maayos nga pagtao it impormasyon angot sa ginatao nga bulig-pinansyal halin sa opisina ni Senator Christopher “Bong” Go pinaagi sa Department of Social Welfare and Development (DSWD) sa banwa it Makato.
Suno kay Mario Diego, presidente it CATODA sa Brgy. Calimbajan, Makato nga na-obserbahan nanda nga matsa gindali-dali ro listahan kamana man nga ginapatigayun eamang ro pag-validate sa compound it panimaeay ni certain Gina Terencio imbes nga idto sa opisina it MSWDO.
Mag-eowas kara, owa man sigon sanda gin-abisuhan kung alin ro mga ginakinahang-ean nga requirements ukon papeles agud mapaeakip sa pagataw-an it ayuda.
Dugang pa ni Diego nga nakaangkon sanda it problema sa pagbuoe it barangay indigency matapos nga owa mag-isyu ro andang punong barangay bangud sa kakueangan it bastanteng impormasyon kung siin raya pagagamiton.
Nasayuran nga kinahang-ean magpasa it kada recipient it xerox copy it barangay indigency form, valid ID kamana man lisensya ag franchise sa mga kapareho nana nga tricycle driver.
Mag-eowas kanda nga mga miyembro it TODA, nagpasa man ro pilang mangunguma, single parents ag Person with Disabilities sa pag-eaum nga makabaton it ayuda.
Ginasugid nga nagabalor it P3,000 ro igatao nga financial assistance ag nakataeana nga iga-release sa Setyembre 22.
Sa pihak nga parte, ginklaro man ni Ms. Gina Terencio, Provincial Coordinator ni Senator Christopher “Bong” Go sa probinsya it Aklan nga bangud sa na-eksperyensyahan nga kalisod tuga it pandemya hay ginpakamayad it andang grupo nga magpangayo it bulig sa Malacañang partikular sa opisina it senador.
Tuyo sigon it andang grupong UMA Ilonggo nga sangka Non-Government Organization nga mabuligan ro mga mangunguma ag iba pang pigado nga sector.
Samtang, ginkalipay man kara nga naging positibo ro pagsabat ni Senator Go kung siin tanan nga 17 kabanwahanan sa Aklan hay gintaw-an it nagakaigo nga ayuda.
Suno kay Terencio kapin sa 2,000 ka mga recipient ro gintaeana sa banwa it Makato ag sambilog eon sa prayoridad kara nga mataw-an hay ro mga tricycle driver.
Nakasugtanan man sigon nanda it MSWDO nga tungaon ro paglista agud malikawan ro pagdueotdutan it mga tawo rason nga may pilang pumueoyo nga naga-pasa it requirements sa andang compound.
Ginklaro man kara nga hugut nanda nga ginasunod ro minimum health protocols kaman man nga may naka-poste nga katapo it kapulisan ag MDRRMO para magtao it dugang nga seguridad.
