KALIBO, Aklan—Bukon it pabor ro gobyerno probinsyal sa pagtukod it Boracay Island Development Authority ukon BIDA bill.
Raya ro pahayag ni Aklan Vice Governor Reynaldo Quimpo sa interview it Bombo Radyo Kalibo.
Suno kana nagakabaeaka sigon sanda nga madueaan it otoridad ro lokal nga gobyerno it Malay ag gobyerno probinsyal sa pagdumaea it Boracay engkaso nga maging laye ro BIDA.
Base sigon nga makaangkon it problema sa uilihi angot sa mga plano ag proyekto nga gustong iduso it LGU ag provincial level sa Boracay.
Ginbasa ag gintun-an man sigon nanda ro mga probisyon it nasambit nga proposisyon kung siin natukiban nanda nga matsa madueaan eon it kinamatarong ro probinsya sa pagdumaea sa isla.
Sa pagtukod it BIDA, raya hay pagakabigon nga Government-Owned and Controlled Corporation ukon GOCC sa idaeum it pagdumaea it Office of the President, sa baylo nga sangka ahensiya it Department of the Environment and Natural Resources (DENR).
Samtang, ginpabutyag man si Vice Governor Quimpo nga mabahoe ro maibulig it BIDA sa nagapadayon nga rehabilitasyon sa Boracay eabi eon ag pila sa mga proyekto hay nagakinahang-ean it mabahoe nga pondo.
Nasayuran nga ko 2018, ro Boracay hay ginpasaraduhan sa sueod it an-om nga buean agud nga mataw-an it daean ro paglimpyo ag rehabilitasyon matapos raya nga bansagan ni Pangueong Rodrigo Duterte bilang “cesspool” bangud sa problema sa palibot mag-eowas pa sa overdevelopment ag overcrowding nga isyu.
