KALIBO, Aklan—Bukon pa it haum ro Godofredo P. Ramos Airport sa Caticlan, Malay nga magbaton it mga international flights.
Raya ro ginpahayag ni Mr. Denmark Suede, sangka lisensiyadong piloto ag nurse nga nakabase makaron sa Sydney, Australia.
Suno kana nga mag-eowas nga owa it nagakaigo nga pasilidad, ro runway eamang kara hay may haba nga 1,800 meters nga kapabli eamang nga magbaton it mga eroplano kapareho it Airbus 320 nga may passenger capacity nga 240 kumpara sa Kalibo International Airport nga may una nga 2,500 meters it runway.
Madumduman nga hugut nga ginapamaeabagan it Aklan provincial board ro pagbaton it international flights sa Caticlan airport nga mas maeapit kunta sa world-class nga isla it Boracay bangud sa isyung ekonomiya ag congestion.
Sa pihak nga parte, gindugang pa nana nga bukon it Civil Aviation Authority of the Philippines ukon CAAP ro dapat nga basueon it provincial board sa pagbaton it paeuparan it chartered flight halin sa Taiwan ko nagtaliwan nga Disyembre 26 bangud nga ro nagatau it ruta it mga eroplano hay ro Civil Aeronautics Board ukon CAB.
Bangud nga indi pwedeng makipag-compete sa Caticlan airport nga ginapadaeagan it sangka pribadong kompaniya, ginsuhestiyon nana nga mag-lobby ro mga opisyal it probinsiya sa national government agud nga mapahaba pa ro runway it Kalibo airport it hasta sa 3,000 meters kamana man nga mas pang ipa-improve ro mga pasilidad it terminal building agud nga madaling mai-market ro Boracay bukon eamang sa Asya kundi hasta it Europa.
