Makaeoeooy ro kahimtangan it 815 Pilipinong trabahador nga magaeopad kunta sa Kuwait apang gulpi nga napunggan matapos suspendihon it Kuwaiti Interior Ministry ko Mayo 10, 2023 ro pagta-o it working visa.
Nag-eabag sigon ro Pilipinas sa bilateral agreement.
Nagtukod sigon it mga shelter sa Kuwait ro Pilipinas nga sangka pag-eabag sa kasugtanan.
Ro shelters ro ginadaeaganan ag ginpangayuan it bulig it mga OFWs nga ginamaltrato.
Suno sa Department of Foreign Affairs (DFA) nga uwa ginaeabag nga labor fact ro Pilipinas sa Kuwait.
Uwa it abiso ro Kuwait ag gulpi eon lang ginsuspende ro pag-isyu it visa sa mga Pilipinong obrero.
Maskin ro Department of Migrant Workers (DMW) hay nakibot sa gulping pagpapundo sa pagta-o it visa.
Ro mga makaeoeooy hay ro mga paeopad eon kunta ko adlaw ngato kat mag-isyu it mandato ro Kuwait.
Maabo kanda ro idto eon sa NAIA ag nagapahaom sa paghalin apang sangka masaklap nga balita ro nabaton nanda nga ginsuspende ro pag-isyu it visa.
Ro mga nag-abot nga OFWs sa Kuwait, sang adlaw matapos nga gin-isyu ro suspension hay uwa eon ginpapanaog it eroplano ag ginpabalik eon lang it Pilipinas.
Masaklap nga eksperyensya para kanda!.
Nagakadapat nga ayudahan it DMW ro mga obrerong naapektuhan it marahas nga desisyon it Kuwait government.
Mag-eowas sa 815 nga naunsiyami ro paghalin, kapin pa sa 2,849 ro nai-process eon ro andang papeles.
Kaeabanan sa mga pahalin kunta nga trabahador ag domestic helpers.
Mag-eowas sa kwartang ayuda sa mga worker, buligan it DMW ro mga apektadong workers nga makausoy it ibang nasyon nga paga-aplayan.
Inde eon makipag-istorya sa Kuwait para ipadayon ro pag-isyu it visa.
