Sa pihak it pagkapasa it Republic Act No. 10627 ukon ro Anti-Bullying Act, nagapadayun sa gihapon ro bullying.
Napueong dag-on eon kita nga may laye angot kara apang nagakatabu sa gihapon ro bullying, may mga biktima gihapon.
Ano ayhan ro problema?
Kan-o eamang hay ginbalita ro sangka 13-anyos nga eaeaki nga ginbuno sa dughan ag napatay it anang kaklase nga edad 15.
Suno sa nakapatay, bullying sigon ro ugat it away.
Makasueubo nga sa gulpiyada , daywang kabuhi it pamatan-on ro naguba.
Base pa sa survey nga ginpatigayon it Programme for International Student Assessment ukon PISA, nagatuhaw nga sa mga 15 years old nga kaibahan sa survey, 65% kara hay nagahambae nga naka-experiensiya sa gihapon it pagpang-bully it pilang beses sa sang buean
Kinahangean nga usisaon kon kung epektibo ro mga pamaagi nga gintaeana sa idaeum it Department of Education (DepEd) Order No. 55, kaibahan ro mga insigidang sabat, pag-report, pag-usoy it kamatuoran ag dokumentasyon, interbensyon ag mga tikang sa pagdisiplina.
Kinahangean nga siguraduhon ro kaeowasan it mga estudyante samtang sa eskuwelahan bilang makabig nga ikaywang baeay it atong mga unga.
Dag-on 2021 kat ginbilog it DepEd ro Child Protection Unit agud nga pabakuron ro mga polisiya ag commitment kara nga protektahan ro kada pamatan-on nga estudyante.
Usisaon naton ro mga nakabaehag kara, naipatuman baea it maayos , nakabagay pa baea sa tiempo ukon basi nga kinahangean eon nga bag-uhon.
Dahanan naton ro mga pamatan-on, indi naton pagpabay-an nga sanda hay mapahamak.
Itau naton ro kahigayunan nga makapangabuhi sanda it maayos ag masadya.
