KALIBO, Aklan — Kadungan it naga-grabe nga tensyon sa tunga it Israel ag Iran, may nagatuhaw makaron nga mga espekulasyon nga posibleng gamiton it Amerika ro andang pinakamabaskog nga armas nga bunker buster bomb.
Suno kay Bombo International News correspondent Pinoy Gonzales sa Amerika nga tuyo it pag-atake it Israel sa Iran nga samaron ro andang nuclear program.
Owa sigon naila ro US ag mga kaalyado kara nga nasyon partikular ro European countries nga makabilog it nuclear weapon ro Iran, kun sa siin ro enriched uranium nga kinahangeanon para kara hay ginapatihan nga gina-obra ag ginatambak sa Fordo facility nga makit-an sa idaeum it bukid sa northwestern part it Iran.
Ginpahayag ni Gonzales nga sambilog sa mga armas nga makasarang nga magsamad sa nasambit nga pasilidad ag sa mga centrifuge kara hay ro penetrator bomb, nga mas kilaea bilang bunker-buster.
Ro armas hay may haba nga 20 feet , timbang nga 30,000 pounds ag makasarang nga mag-eapos hasta sa 200 feet sa idaeum it eugta antes nga sumabog.
Ro bomba nga ro war head hay ginapatihan nga may termite hay partikular nga gin-design agud nga gamiton kontra sa mga target nga sa idaeum it eugta ag napalibutan it madamoe nga kongkreto, kapareho it Iran ag North Korea.
Owa it ibang military sigon ro may access sa B-2 Spirit stealth bomber nga nagadaea it nasambit nga bomba.
Ro B-2 hay pwedeng magdaea it daywang makarondaya nga bomba ag presenteng nakabase sa Whiteman Air Force Base sa Missouri, USA.
Apang sa makaron suno kay Gonzales hay palaisipan pa kon pagagamiton gid man it Amerika ro andang pinakamabaskog nga armas bilang suporta sa Israel.
Nauna kara, ginpamalibaran it mga opisyal it Iran ro alegasyon it Israel nga nagahimo sanda it armas nukleyar.
