KALIBO, Aklan—Kapin sa P216,000 pesos ro gin-aywanan nga danyos it sunog nga nag-eontad sa isla it Boracay sa mismong kick off it Fire Prevention Month.
Suno kay FO1 Kat Jardaleza it Bureau of Fire Protection ukon BFP Boracay sub-station nga ro daywang ka panaegan nga baeay hay gin-eamon it kaeayo bandang alas-4:00 it hapon, adlaw it Biyernes.
Nagbuhay it haeos 20 minutos ro fire fighting operation it mga nagrespondeng fire fighters antes nga gindeklarang fire-out kasunod kara ro ginpatigayon nga mapping operation.
Ginpahayag dugang ni FO1 Jardaleza nga uwa it nailistang naninahan sa insidente ag padayon pa nga ginaimbestigahan ro gintunaan it kaeayo.
Samtang, kadungan sa ginpatigayon nga kick-off it Fire Prevention Month, nagpatigayon it motorcade ro BFP Boracay sub-station nga ginsundan it pila ka mga aktibidad nga andang ginpahaom.
Angot kara, nagpadumdom sa publiko si FO1 Jardaleza nga maging responsable ro tanan ag maghaeong sa kaeayo kapin eon makaron nga tuman ro kainit it panyempo nga nabatyagan sa probinsya it Aklan.
Likawan nga aywanan ro mga appliances nga nakasaksak kapin eon kon uwa it tawo ro baeay ag inde pag-aywanan ro mga ginaeaha kapin eon kon sa dapog raya ginahimo agud nga malikawan ro maeapnagon nga sunog nga makahalit sa propyedad nga ginpundar it kada isaea.
