KALIBO, Aklan—Plano makaron it Bureau of Quarantine (BOQ) nga magbukas it andang satellite station sa banwa it Kalibo para maghatod it serbisyo sa mga pumueoyo nga gustong magbuoe it “yellow card” nga ginagamit para sa pagbyahe sa guwa it nasyon.
Ginpahayag ni BOQ Director Dr. Roberto Salvador Jr. nga mag-eowas sa mga satellite station sa nagkaeain-eain nga mga lugar sa National Capital Region (NCR), target man it taeatapan nga magbukas it satellite stations sa Kalibo, Bacolod, Legazpi city, General Santos city ag Palawan.
Ro yellow card ukon International Certificate of Vaccination and Prophylaxis hay sangka dokumento nga may sueod it mga listahan it mga bakunang nabaton it sangka indibidwal.
Ginatao raya it ahensya ag posibleng ipakita it natungdan nga indibidwal bilang requirements sa nasyon nga paga-adtunan.
Gin-engganyo man kara ro mga gustong magbuoe it yellow card nga mag-apply pinaagi sa andang online booking system.
