KALIBO, Aklan—Napukaw ro atensyon it mga pumueuyu matapos nga mataeupangdan nga napuno it tubi ro mga gin-obra nga burial grounds para sa mga naging biktima it COVID-19 sa sueod it Kalibo Municipal Cemetery.
Raya hay kasunod it pilang adlaw nga pagbubu it mabaskog nga uean.
Ginasugid nga sangka igbata it gin-eubong sa lugar ro nagreklamo matapos nga masoe-ob it tubi-uean ro eubnganan nga nahamtang sa pathway it sementeryo.
May sambilog man nga matsa bag-ong gin-eubngan pa eamang.
Makita man nga napuno it kiti-kiti ro mga nakabukas pa nga eubnganan nga ginabana-bana nga may kadaeumon nga 6 to 7 feet.
Pila eamang nga nakabukas nga eubnganan ro ginbutangan it steel plate samtang ro iba hay bukas nga makabig nga takaw-aksidente.
Ginakabaeak-an raya it mga residente nga maeapit sa lugar nga nag-upload it mga litrato sa social media bangud nga nag-umpisa eon sigon ro rainy season ukon tiempo it tag-uean sa nasyon.
Samtang, ginatinguhaan pa it Bombo Radyo Kalibo nga mabo-oe ro sabat it Kalibo Municipal Inter-Agency Task Force.
