KALIBO, Aklan—Nagpanawagan si Buruanga mayor Concepcion Labindao sa anang mga pumueuyu nga maging kalmado matapos nga namatay ro andang nailistang kauna-unahan nga kaso it Coronavirus Disease 2019 (COVID-19).
Ro pasyente hay 83 anyos nga babayeng makabig nga co-morbid.
Mag-eowas nga mahina ro immune system bangud sa anang edad hay may ginabatyag raya nga pulmonya.
Gindugang pa ni mayor Labindao nga owa it travel history ro pasyente ag posibleng naangkon kara ro sakit halin sa anang ibang miyembro it pamilya nga nagapinanaw.
Nagpatigayon eon sigon it contact tracing ro lokal nga gobyerno ag ginpaidaeum sa swab testing ro mga nakasalamuha it pasyente ag ginaeauman nga maga negatibo ro resulta.
Ko nobyembre 30 sigon hay nadanlog ro pasyente sa andang baeay ag gindaea sa ospital sa Motag, Malay.
Apang gin-refer raya sa Aklan Provincial Hospital ag ginpaidaeum sa swab test ag nag-positibo sa makamaeatay nga sakit base sa resulta nga ginpaguwa halin sa Western Visayas Medical Center sa siyudad it Iloilo.
Ko December 1 bandang alas-9 it gabi-i hay namatay ro pasyente ag ro result halin sa WVMC hay nag-abot bandang alas-11 it gabi-i man ngaron.
Insigida nga gin-cremate ro bangkay it pasyente ag naka-facility quarantine ro mga pamilya nga nagdaea kana sa ospital.
Angot kara, ginpadumdum pa ni mayor Labindao sa mga taga-buruanga nga indi mag-panic ag sundon gihapon ro patakaran nga ginapatuman kapareho it social distancing, pirmeng paghugas it alima ag pagsuksok it face masks ag face shield.
Dapat man sigon nga pabaskugon ro resistensiya ag stay at home kon owa man lang it importanteng panaw.
