KALIBO, Aklan—Uman nga nakalista it 37 ka mga panibag-ong kaso it coronavirus disease 2019 ukon covid 19 sa banwa it Buruanga.
Suno kay Buruanga Mayor Concepcion Labindao nga kaabuan sa mga nailistang panibag-ong kaso hay may close contact sa mga pasyenteng nauna eun nga nagpositibo sa covid-19.
Sa makarun hay may una eun sandang kabilugang 91 ka mga aktibong kaso it makamaeatay nga sakit.
Kapin man sa 52 ro nakataeanang igapaidaeum sa swab test matapos nga makaangkon it close contact sa covid-19 positive.
Samtang, ginpahayag dugang ni Mayor Labindao nga sa makarun hay apektado man ro operasyon it pilang ka mga taeatapan sa andang munisipyo matapos nga magpositibo sa covid-19 ro pilang ka mga empleyado.
Bangud kara, nag-apela man raya sa anang mga pomoeuyo nga padayun nga magsunod sa health protocol kapareho it pagsuksok it fce mask ag magpabilin eamang sa sueod it panimaeay kung owa man lang it importanteng pamanawon.
