BALITA Espesyal–Sangka local bus operator sa Poland ro napilitang ipapundo ro ruta it sambilog sa andang bus bangud nga ginareklamo it mga relihiyoso ro numero kara!
Gin anunsyo kan-o eamang it bus company nga PKS Gdynia nga indi eon magabiyahe ro andang mga bus nga may route number 666 nga paagto sa banwa it Hel sa Poland.
Ro Hel hay sangka resort city sa Puck County, Northern Poland ag raya hay kilaea sa mga beach ag manami nga mga taean-awon.
Mag-eowas sa mga beach, ginadayo raya it mga turista bangud sa novelty appeal it bus 666.
Sa tan-aw it mga turista, bumagay sa pangaean it banwa nga katunog it kataga nga “Hell” ukon impiyerno ro numero it bus.
Suno sa mga report, ro Bus 669 nga magabiyahe paagto sa Hel hay magapundo eon umpisa sa June 24.
Ro pag-phase out sa Bus 666 hay ginpatigayon it kompanya bangud nga pilang dag-on eon sanda nga gina disturbo it mga religious groups bangud nga tan-aw it mga raya nga bukon it manami nga joke ro isyu angot sa impiyerno ag satanas.
Nag-umpisa nga magbiyahe ro Bus 666 ko 2006 bilang hinangae it mga residente it Hel ag ko mga staff it PKS Gdynia.
Bangud sa kaboeo-boeo nga numero it bus ag pangaean it banwa, ginadayo raya it mga local ag international tourists sa Poland.
Ro iba hay nagasakay sa nasambit nga ruta agud nga makahinangae ag makapabugae nga nakasakay eon sanda it bus paagto sa impiyerno.
Ginkalipay man it mga relihiyoso sa Poland ro pagbaylo it pangaean it bus apang pila sa mga residente it Hel ro owa nalipay bangud nga kaparte eon it andang banwa ro Bus 666.
