Apektado makaron ro tanan nga sector sa probinsya it Aklan mangin sa bilog nga Western Visayas bangud sa sigidas nga power interuptions tuga man it kakueangan it supply it kuryente sa bilog nga nasyon.
Bangud kara, nagpanawagan ro grupo it mga negosyante sa probinsiya it Aklan sa gobyerno nga maghimo eon it nagakaigo nga tikang agud nga masolusyunan ro nasambit nga krisis.
Suno kay PCCI Boracay consultant Elena Tosco Brugger nga maabu nga mga establisimento komersiyal ro apektado makaron partikular sa isla it Boracay eabi eon ro mga restaurants.
May mga pilang restaurants sigon ro owa naka-operate bangud sa nagpalya nga generator sets ag owa it nakataeana nga back up.
Makahueuya sigon sa mga bisita ag turista kasunod man it pagselebrar it love boracay bangud sa sobrang init it panyempo tapos owa pa it enerhiya it kuryente.
Suno pa kana nga mabahoe ro impact it nasambit nga krisis sa sosyudad eabi eon sa business sector bangud sa naga amat-amat paeang ro pagbangon it turismo sa probinsya it Aklan tuga man it pagpaeanasa it pandemya apang dugangan man makaron it manipis nga power supply.
Angot kara, may posibilidad it pagkalugi sa mga negosyo kung magapadayon pa ro presenteng problema nga nae-eksperyenyahan.
Raya hay bangud sa patay-sindi nga supply it kuryente, owa man sanda it mahimo kungdi maggamit it generator sets nga nagadoble sa andang production cost.
Sa pihak nga parte, apela nana nga indi eon pagpabuhayon ro problema agud nga indi maga antus ro parehong publiko ag mga negosyante.
