KALIBO, Aklan—Business usual sa Darwin, Australia sa pihak it nagapadayon nga paeag it 2019 coronavirus disease ukon COVID-19.
Suno kay Bombo International Correspondent Zhalimar Ascaño, tubong banwa it Tangalan apang presenteng nagatrabaho sa Darwin, Australia nga bukas pa ro mga establisyimento komersyal, malls, ag iba pa.
Raya hay maskin nga may nailista eon nga kaso it COVID-19 sa nasambitang estado.
May nagpanic buying man sigon kasunod it pag-lockdown sa ibang estado it nasyon apang gilayon raya nga nakontrol it gobyerno kaparehas sa paglimita it andang baeak-eon agud nga inde mawad-an it supply sa sueod it mga supermarket ag grocery stores.
Ro manami sigon sa taga-Australia hay kon anu ro ginapatuman nga protocol it gobyerno hay gilayon ro mga raya nga nagasunod.
Halimbawa eon lang kara ro pagpatuman it social distancing, pagdis-infect sa mga matawo nga lugar ag ro pagpabilin nga malimpyo sa kaugalingon.
Suno pa kay Ascaño, pagsueod mo it grocery ukon supermarket hay provided eon ro mga wipes nga pang dis-infect sa mga kart.
Samtang, ro public transportation nga ginapanag-iyahan it gobyerno hay sigidas nga nagapamasada apang halin kat may outbreak it COVID-19 pandemic hay libre eon ro andang pamasahe bilang ayuda sa mga empleyado nga padayon nga nagatrabaho.
