KALIBO, Aklan – – – Nagapadayon ro pagbuhos it mga turista sa isla it Boracay.
Raya hay sa pihak it nakataeanang pagpasara sa isla.
Base sa datus it Malay Municipal Tourism Office, nakalista it 375,993 nga arrivals para sa unang daywang buean it presenteng dag-on.
Mas mataas gihapon raya sa 344,026 tourist arrivals nga nailista ko nagtaliwan nga dag-on sa magkaparehong period.
Nasayuran nga halin it Marso 1 hasta it 27, nag-abot eon sa 140,643 ro mga turista sa isla.
Ginapahayag nga mabahoe ro posibilidad nga maeampasan kara ro 167,445 tourist arrivals nga nailista sa magkaparehong period ko 2017.
Sa makaron hay mas maabo gihapon nga mga turista ro mas ginpili nga magpamaeandong makaron nga tyempo it Semana Santa sa sikat nga tourist destination sa bilog nga kalibutan.
