KALIBO, Aklan—Ginbalik eon it sangka airline company halin China ro direct flight sa Kalibo International Airport.
Suno kay Engr. John William Fuerte, manager it Civil Aviation Authority of the Philippines (CAAP)-Aklan, may unang tatlong ruta ro Loong Airlines kun sa siin nagapatigayon eon raya it maiden flight kahapon halin sa Hangzhou, China paagto sa Kalibo sakay ro 171 nga pasahero nga puro Chinese tourist paagto sa Boracay.
Makataliwan sigon ro haeos daywang dag-on nga napundo ro andang direct flight sa nasambit nga paeuparan bangud sa COVID-19, uman nga ginbalik ro andang biyahe pinaagi sa chartered flight ag ginaeauman nga magiging commercial flight raya sa masunod nga mga inadlaw.
Sa Hulyo 4 hay paga-umpisahan ro ruta sa Ningbo ag sa Hulyo 6 man sa Wenzhou nga maga-operate it tatlong beses kada domingo.
Sa makaron hay naga abot eon sa lima ro direct flight halin sa China.
Tuyo kara nga masabat ro maabu nga numero it pasahero paagto sa Boracay.
Mag-eowas sa China hay padayun gihapon ro direct flights sa ibang nasyon kapareho it Korea ag Taiwan.
Sa pihak nga parte, ro domestic flights hay kapin sa 5 hasta 6 kada adlaw nga may biyaheng Manila to Kalibo vice versa.
Ginakabig ro Kalibo International Airport bilang sambilog sa pinaka-masako nga paeuparan sa bilog nga nasyon.
