KALIBO, Aklan—Temporaryong ginkansela ro biyahe it mga Roll-on-Roll-off ukon RoRo vessels ag motorbanca halin sa Caticlan Jetty Port paadto it Batangas, Romblon ag Mindoro.
Sa advisory nga ginpaguwa ni Lt. Commander Marlowe Acevedo it Philippine Coast Guard (PCG)-Aklan, halin alas-5:00 kahapon it hapon hay uwa eon ginpasugtan pa nga mag-eayag ro mga RoRo vessels matapos nga ginpaidaeom sa Tropical Cyclone Wind Signal Number 1 ro bilog nga probinsya it Aklan bangud sa bagyong Ursula.
May kaangtanan kara, gin-abisuhan man it Philippine Coastguard (PCG)-Caticlan ro mga pasahero nga sunrise to sunset eon lang ro byahe it mga motorbanca halin sa Caticlan Jetty Port to Cagban Port and vice versa.
Samtang, nakaalerto eon man ro Provincial Disaster Risk Reduction Management Council (PDRRMC)-Aklan ag padayon nga ginamonitor ro sitwasyon it panyempo.
