KALIBO, Aklan—Ginpaidaeom sa 14-diyas nga granular lockdown ro bilog nga C. Laserna St., Barangay Poblacion, Kalibo kaina it alas-8:00 it gabi-i, Setyembre 20, 2020.
Raya ro ginkumpirma ni Punong Barangay Niel Candelario matapos ro ginpatigayon nga pueong it Local Inter-Agency Task Force it banwang Kalibo.
Suno kana, raya nga tikang hay bilang precautionary measures matapos nga makalista it daywang kumpirmadong kaso it Coronavirus Disease 2019 ukon COVID-19 ro daywa ka mga purok it nasambit nga lugar.
Antes sigon sanda nagpatuman it lockdown hay nauna eon nanda nga gin-abisuhan ro mga apektadong residente.
Raya hay para maimpormahan sanda ag makapahaum it andang pagkaon ag iba pang kinahang-eanon sa sueod it daywang dominggo.
Gindugang pa kara nga samtang may naga-iral nga lockdown hay indi anay pagpasugtan nga makagguwa it andang baeay ro mga residente maeuwas sa may mga trabaho ag emerhensiya.
Nasayuran nga ro C. Laserna Street hay ginabilog it an-om ka mga purok kung sa siin makabig raya nga populated area kamana man nga maabo nga entry ag exit point.
