Kalibo Aklan ——–Uman nga ginpasiguro ni Civil Aviation Authority of the Philippines (CAAP-Aklan) Manager Engr. Eusebio Monserate, Jr. ro andang kahauman sa ginaeauman nga mas pang pagbuhos it mga Locally Stranded Individuals (LSI’s) pauli sa Aklan kasunod it pagbawi sa temporaryong pagsuspinde sa pagpa-uli kanda sa Rehiyon .
Ro tatlong nagapangunang airline companies suno kana nga naga operate it domestic flights hay gintaw-an it kahigayunan nga makabiyahe it daywang beses sa sueod it sang domingo ukon nagapatigayon eamang it sangka flight kada adlaw.
Nagapabilin man suno nga suspindido ro mga international flights .
Ro nasambit nga patakaran sigon hay base sa Executive Order ni Aklan Governor Florencio Miraflores.
Gindugang pa ni Monserate nga nagabueuligan ro airport immigration, aviation ag health authorities sa hugut nga pagpatuman it health protocols sa andang operasyon sa nasambit nga paeuparan agud nga masiguro ro kaeowasan ag kamaeayran it mga pasahero ag tawuhan .
Hugut man nga gina-usisa ro mga kinahangeanon nga dokumento antes nga makasakay sa eroplano partikular ro negatibong resulta it andang Reverse Transcription Polymerase Chain Reaction (RT-PCR) .
