National News———-Sa ginkasang ‘Oplan Biyaheng Ayos: Summer Vacation 2022,’ aktibo eun man ro operational measures it Civil Aviation Authority of the Philippines (CAAP).
Raya hay sa tunga it ginaeauman nga pagdagsa it mga pasahero sa Semana Santa umpisa April 10 hasta 18, 2022 ag sa tiyempo it tag-init.
Gintukod eun ro maximum deployment it mga service ag security personnel sa 12 Area Managers nga may buyot it 42 CAAP-managed airports nga may commercial flights sa nasyon.
Ginapatuman ro ‘no leave’ policy sa kasagsagan it Oplan Biyaheng Ayos.
Suno kay Director General Captain Jim Sydiongco, padayun ro pagpatuman it mga pagsinueondan sa CAAP airports agud nga malikawan ro pagkalhit it COVID-19 sa mga pasaherong magabakasyon ag pauli sa nagkaeain eain nga probinsya.
Pagastriktuhan man ro pagbantay sa seguridad sa tanan nga paeuparan sa nasyon.
Nagbueoligan ro mga airline company ag lokal nga gobyerno para sa maayos nga pagproseso it mga biyahe it mga pasahero, mas kapin eun sa check-in counters.
Magataeana man it dugang nga airline personnel para maserbisyuhan ro mga biyahero.
Magapatindog man it Malasakit Help Desks agud nga masuportahan ro mga kinahangeanon it mga pasahero.
