KALIBO, Aklan—Plano makaron it Department of Agriculture (DA) nga magpatuman it calibrated re-population sa hog industry.
Raya hay para indi makaangkon it kakueagan sa supply it mga karneng baboy sa nasyon kasunod gihapon it epekto it African Swine Fever ukon ASF.
Suno kay Engr. Remelyn Recoter, Regional Executive Director it DA Region 6 nga base sa andang naistoryahan kaina sa ginpatigayun nga pueong kaibahan si Secreatry William Dar nga kinahang-ean nga maka-re-populate sa mga lugar nga una sa green zone kun siin naeakip ro Western Visayas.
Raya sigon hay para sa mga ineteresadong backyard ag commercial hog raisers nga gustong dugangan ro andang stocks.
Target sigon it Agricultural Credit and Policy Council (ACPC) nga magbutang it kapin sa 40 million pesos nga pondo sa bilog nga rehiyon sais.
Posible suno kana nga ro ACPC ro maging financing window it nasambit nga proyekto.
Base sa inisyal nga impormasyon, pagatungaon sa waeo nga cluster ro proyekto kun sa siin may 60 ka mga miyembro ro kada cluster.
Ro mga interesadong maging miyembro suno kana hay pwedeng magloan sa ACPC, Land bank of the Philippines ag Development Bank of the Philippines.
Ginpahayag man ni Engr. Recoter nga magapatawag sanda it online orientation pagkatapos it holy week kaibahan ro Local Government Unit, swine raisers ag mga pribadong kompanya.
