KALIBO, Aklan—Ginkumpirma ni Bombo International Correspondent Ira Pedrosa it Los Angeles, California nga nag-umpisa eon ro covid 19 mass vaccinations sa nasambit nga estado.
Prayoridad suno kana ro mga frontline healthcare workers ag mga senior citizens nga mga residente.
Sa makaron hay ginatumod pa sigon it estado kon sin-o ro masunod nga pagaturukan it bakuna sa pag-abot it masunod nga wave it available nga bakuna.
Ginaeauman nga sa unang domingo it Enero hay maga-abot ro haeos 2.5 million nga doses it bakuna nga himo it Pfizer BioNTech ag bag-ong gin-aprubahan nga Moderna vaccine.
Gindugang pa ni pedrosa nga owa it pieilitan ro pagpabakuna.
Apang kon imaw ro paga-kutan-on , indi sigon imaw magapabakuna bangud sa kahadlok tuga it naexperiensiyahan nana dati sa pagpaturuk it flu vaccine nga imbes magmayad hay nagmasakit pa sigon imaw.
Ro nagmandu sigon agud nga mapadasig ro pag-obra it bakuna it Pfizer hay naghalin kay incumbent president Donald Trump rason nga ro kredito hay dapat nga maagto kana ag bukon it kay incoming US president Joe Biden.
