KALIBO, Aklan—Nagapabilin nga lockdown ro California, USA sa tunga it nagapadayon nga epekto it 2019 coronavirus disease ukon COVID-19 pandemic.
Suno kay Bombo International Correspondent Lyn Diamond, solohanon nga bukas makaron hay ro mga grocery stores.
Ro dating masadya ag magutok nga estado hay gulping naghawan tuga it nagapadayon nga epekto it COVID-19.
Mga disiplinado suno kana ro mga American rason nga sa andang estado hay sangkiri eamang ro infected it makamaeatay nga sakit kon ikumpara sa maeagkong syudad nga New York ag Michigan.
Ro nasambitang mga syudad ro ginakabig nga epicenter it COVID sa USA.
Maskin sin-o sigon hay nahadlok eon magguwa bangud nga inde masayuran kon ro imu nga kasub-eang hay infected ukon bukon.
Ginpahayag dugang ni Diamond nga bukon nanda it problema ro pagkaon kaya uwa eon sanda it rason para magguwa pa.
Suno pa kana, gina-enjoy eon lang nanda ro pagpabilin sa tagsa ka panimaeay kaibahan ro andang bilog nga pamilya.
Nag-apply eon man sigon sanda it unemployment status tuga it COVID ag ginaeauman nga makabaton sanda it ayuda halin sa gobyerno.
Sa pinakaulihing datos, ro USA hay nakalista eon it 188,592 nga kaso it COVID-19.
Sa nasambitang numero, 4,056 ro namatay samtang 7,251 ro nakarecover.
