KALIBO, Aklan—Sigidas eon ro preparasyon it gobyerno it Cambodia para sa nakataeana nga 2023 Southeast Asian ukon SEA Games nga maga-umpisa sa Mayo 5 hasta it 17 it presenteng dag-on.
Suno kay Bombo International Correspondent Christian Faye Ibabao-Yumang, sangka manugturo sa Phonm Penh, Cambodia nga nag-anunsyo eon it long vacation ro pamunuan it pampublikong eskwelahan sa nasambit nga nasyon bilang kaparte it andang preparasyon.
Sa raya sigon nga pamaagi hay madecongest ro mga saeakyan sa karsadahon bangud nga kon uwa it klase hay naga-ueoli eon sa tagsa-tagsa nanda ka mga probinsya ro mga estudyante.
Apang, sanda nga sa pribadong sektor hay padayon ro andang trabaho ag uwa pa it abiso para sa long vacation kaparehas sa pampubliko.
Ginpahayag dugang ni Yumang nga nagapadayon ro pagsaayos ag konstraksyon it dugang nga mga dekorasyon agud nga mashowcase sa mga delegado ro kultura it nasyon.
Eubus sigon nga ginapahauman makaron ro mga hotel and resorts accommodation it mga atleta, coaches, trainors ag iba pang delegado it mga natungdan nga nasyon agud nga maging komportable ro mga raya sa temporaryo nandang pagpabilin sa nasyon.
Maging sanda nga mga overseas Filipino workers hay excited eon sa mabahoe nga sporting events ag kon may tyansa hay inde sanda magpaulihi nga magtan-aw para suportahon ro mga atletang pinoy.
