KALIBO, Aklan—Gin-suspinde ro nakataeana kunta nga Career Service Examination-Pen and Paper Test sa probinsiya it Aklan ag bilog nga nasyon sa March 15.
Suno kay Leo Jamorin, OIC provincial director it Civil Service Commission ukon CSC-Aklan nga raya hay kasunod it pagdeklara ni Pangueong Rodrigo Duterte it State of Public Health Emergency tuga it paeag it coronavirus disease ukon COVID-19 sa nasyon.
Suno sa CSC, “until further notice” ro suspensyon it eksaminasyon.
Ginpahayag ni Jamorin nga raya hay kaparte it pre-emptive health measure agud nga malikawan ro pag-abu pa it kaso it sakit sa nasyon.
Suportado man sigon nanda ro ginahimo nga aksyon it national ag local government units kontra sa virus.
Pagahiwaton kunta ro civil service exams sa tatlong school centers sa Kalibo kun sa siin masobra sa 1,700 nga indibidwal ro nakarehistro nga magabo-oe it Professional ag Subprofessional Level it exam.
Sa dugang nga detalye ag masunod nga schedule it exam, pwede sigon nga makipag-angot ro mga examinees sa andang taeatapan sa 3rd floor it ASU administration building.
