KALIBO, Aklan–Presenteng nagapabilin sa bisinidad it banwang New Washington ro sangka cargo ship nga sumadsad ko Biyernes it gabi-i sa baybayong sakop it Barangay Polo.
Suno kay Dominador Salvino, Deputy Station Commander for Operations it CGS-Aklan nga ginahueat pa it andang kapitan nga magmanami ro tyempo bangud indi pa sanda maka-manuver tuga it mabaskog nga humbak.
Madumduman nga inabutan it mabaskog nga hangin ag baeod ro domestic vessel nga LCT Golden Bella nga may sakay nga 14 nga crew members sa kasagsagan it andang biyahe.
Halin ro cargo ship sa bahin it Cebu ag magapaadto kunta sa Batangas kat mabudlayan sanda sa pag-anchor rason nga inapok sanda sa bibi it baybayon it Brgy. Polo, New Washington.
Insigida sanda nga ginrespondihan it Philippine Coast Guard (PCG), Philippine National Police ag mga opisyal it nasambit nga barangay.
Dugang pa ni Salvino nga mahina eon ro makina it kargo ship kung siin subject for inspection eon raya it MARINA.
