KALIBO, Aklan— Na-eogdang ro sangka cargo vessel kapin sa 300 metros maghalin sa baybayon nga sakop it Brgy. Sambiray, Malay bandang alas-10:30 it agahon kahapon.
Maswerteng nakaeowas ro boat captain nga si Rolando Casibo kaibahan ro 12 ka mga crews matapos nga nag-eompat sa nagapa-eobog nga barge ag insigidang narescue ko mga myembro it 605th MARPSTA personnel, Philippine Coastguard Guard (PCG)-Caticlan ag iba pang civilian volunteers sa nasambitang lugar.
Ro BATO TWIN barge hay ginapanag-iyahan it Island Ventures Corporation kon siin may karga raya nga limang ka truck nga pinong baeas ag sangka loader.
Natabo ro insidente samtang naga-eayag raya maghalin sa Sambiray Port paadto it Manoc-manoc Port kat hampakon it mabaskog nga hangin ag maeagkong baeod nga gintunaan it amat-amat kara nga pagka-eogdang.
Sa makaron ro insidente hay padayon nga ginaimbestigahan it PCG-Caticlan sa posibleng makaangkon it oil spill sa nasambitang baybayon.
Samtang, ro mga nakaeowas nga crew ag boat captain hay gilayon nga gindaea sa Malay Hospital para sa andang medical treatment.
