Kalibo, Aklan- Nagapadayon ro hugot nga seguridad nga ginapatuman sa Paris, France kasunod it pag-arangkada it mga hampang nga ginpasakupan it mga atleta maghalin sa nagkaeain-eain nga nasyon sa bilog nga kalibutan.
Suno kay Bombo International Correspondent Rosita Ricaforte, uwa nagapaulihi ro mga Pinoy athletes kon sa siin bilog ro suporta nga ginapakita kanda it Filipino Community sa nasambit nga nasyon.
Maskin nga uwa pa it nabuoe nga medalya ro Pilipinas, nagaeaum ro tanan nga makauli sanda it bueawan nga medalya partikular ro mga ginasalig-saligan nga mga atleta kaparehas nanday Carlos Yulo, Carlo Paalam, Nesthy Petecio ag 19 iba pang atleta.
Maskin napas-eawan si Joanie Delgaco nga makasueod sa diretsahang puwesto sa quarterfinals it rowing event. Apang, buhi gihapon ro pag-eaum kara matapos masiguro ro pangaywang kahigayunan sa pinaagi it repechage round sa women’s single sculls it 2024 Paris Olympics sa Vaires-sur-Marne Nautical Stadium.
Samtang, nagpakitang-gilas mat-a si Carlos Yulo sa anang daywang pet events sa men’s gymnastics individual qualification sa 2024 Paris Olympics sa Bercy Arena. Sueod eon imaw makaron sa finals it all –around, floor exercise ag vault sa nasambit nga Olympics.
