KALIBO, Aklan—Natukiban nga gin-carnap sa Passi, Iloilo ro sangka pribadong saeakyan nga gin-abandona sa prenti mismo it Land Transportation Office (LTO) sa Barangay Tigayon, Kalibo, Aklan.
Suno kay PSSgt. Reniel Bartolome it Highway Patrol Group (HPG)-Aklan, imaw mismo ro nakakita sa nasambitang saeakyan samtang nagamaneho paadto kunta sa syudad it Iloilo kung sa siin, nakaalarma sigon raya sa andang taeatapan.
Base sa inisyal nga imbestigasyon it awtoridad, raya hay ginapanag-iyahan ni Ricky Pagayunan ag ginbaligya online kung sa siin, naghinyo ro buyer nga i-test drive kaibahan mismo si Pagayunan.
Apang, sa uwa ginaeauman nga kahigayunan hay nakapanaog it saeakyan ro tag-iya ag madasig man raya nga ginpaharurot it buyer.
May kaangtanan kara, insigidang ginreport sa taeatapan it pulisya ro insidente hasta nga gin-viber eon sa bilog nga HPG sa rehiyon.
Sa pag-usisa sa behikulo, ginkakas ro plate number; uwa eon it running board ag baterya.
