KALIBO, Aklan—Ginatun-an eon it Department of Environment and Natural Resources (DENR) ro carrying capacity it Boracay Island kasunod sa apela it lokal nga gobyerno it Malay, Aklan ag stakeholders nga i-review ro 19,215 nga presenteng ginabaton nga mga bisita sa nagapangunang tourist destination sa nasyon.
Sa sangka interview, ginpahayag ni Department of Tourism (DOT) regional director Cristine Mansinares, posibleng magguwa ro resulta kara sa June 15.
Angot kara, ginlaygayan it DOT ro LGU nga sundon eon lang anay ro gintaeanang carrying capacity samtang nagahueat it resulta kapin eon ag kinahang-ean pa nandang magpaathag sa ginapangatubang nga isyu kon siin, naeabag ro daily threshold ko holiday break.
Nauna eon nga gin-ako ni Malay Mayor Frolibar Bautista nga uwa nakontrol ro pagbuhos it maabong turista sa Boracay bangud sa mas ginpahaeoga nga travel restrictions ag long weekend break halin sa haeos daywang dag-on nga uwa it bakasyon ro mga turista tuga it pandemya.
Samtang, uwa eon ginpadayon it lokal nga gobyerno ro LaBoracay event nga maga-umpisa kunta makaron nga adlaw, Abril 26 hasta sa Mayo 1 bangud nga uwa raya ginpasugtan it Boracay Inter Agency Task Force (BIATF).
