KALIBO, Aklan—Pagatun-an makaron it lokal nga gobyerno it Malay Aklan nga hinyuon sa Boracay Inter Agency Task Force (BIATF) nga dugangan ro numero it mga turistang puwedeng batunon sa isla.
Raya hay bangud nga uwa pa it plano ro gobyerno nga bag-uhon ro limit it mga turista nga puwedeng bumisita sa isla kamana man ro nakataeana kunta nga pagbalik it LaBoracay nga sambilog sa ginabantayan nga beach party kada summer season.
Suno kay Malay Mayor Frolibar Bautista, kinahang-ean nga i-review eon ro nakasugtanan nga carrying capacity kon siin, aminado sigon sanda nga uwa nakontrol ro kaabuan it mga turistang nagsueod ko Semana Santa nga umabot sa masobra 22,000 nga eagpas sa gintaeanang numero nga 19,215 eamang.
Nagpanindugan ro alkalde nga uwa napuno ro mga accommodation establishment sa pihak it pagbuhos it maabong turista sa sueod eamang it pilang adlaw nga holiday break.
Angot kara, haom sigon ro LGU nga magpaathag sa BIATF sa ginakaeakutan nga isyu.
Nauna eon nga nagpanindugan ro Department of Tourism (DoT) nga kinahang-ean sundon ro carrying capacity it Boracay para maprotektahan ro isla sa over-tourism kamana man para masiguro nga nasusunod gihapon ro health ag safety protocols makaron nga tyempo it COVID-19 pandemic.
