KALIBO, Aklan—Matapos nga nakalista it 21 nga kaso it delta variant it COVID-19 sa probinsiya it Aklan, insigidang nagpatigayon it case backtracking ag contact tracing ro mga natungdan nga Rural Health Unit sa mga nakasalamuha it mga pasyente maskin nga nakarekober eon ro mga raya sa sakit.
Raya ro ginpahayag ni Dr. Cornelio Cutachon Jr. it Provincial Health Office ukon PHO-Aklan.
Suno kana nga ko unang domingo it Agosto hay nagpadaea sanda it 58 nga swab specimen sa Philippine Genome Center pinaagi sa Department of Health region 6 para sa genome sequencing ag nakumpirma nga 21 sa mga raya hay naga-angkon it Delta variant.
Ro sample nga gin-usisa suno kana hay ginbo-oe ko ulihing domingo it Hulyo sa kasagsagan it grabeng pagtaas it average daily attack rate it Coronavirus sa Aklan kun sa siin haeos punuan ro covid ward it mga ospital ag mataas ro positivity rate.
Gindugang pa ni Dr. Cuatchon nga mabahoe man ro andang pagduda kato nga nakasueod eon sa aklan ro delta variant bangud nga haeos magpamilya ro nagataeapnan.
Maskin nga naka-rekober eon ro 20 sa mga pasyente hay igapaidaeum sanda it uman sa RT-PCR test ag engkaso nga mag-negative hay pwede sanda nga makaguwa apang kon mag positive hay pagatimbangon pa ro sitwasyon.
Nasayuran nga sa tinamaan it Delta variant, sambilog kara ro namatay.
Sa pihak nga parte, ginpahayag pa ni Dr. Cuatchon nga magadepende sa numero it kaso it covid 19 kon pagahaeugaan ro quarantine classifications sa aklan pagkatapos it Agosto 31.
Sa makaron hay amat-amat eon man sigon nga naganaba ro kaso ag sa kamatuoran hay ginpapanaog eon sa moderate risk ro aklan bangud sa padayun nga pagnaba it mga bag-ong kaso it covid 19 ag haeos 50 porsiyento eon lang ro healthcare utilization rate ukon low risk.
Mabahoe suno kana ro naibulig kara sa pagpaidaeum sa aklan sa Modified Enhanced Community Quarantine ukon MECQ.
