KALIBO, Aklan—Uwa nagpasindak ro Pinoy boxer nga si John Riel Casimero kontra sa Japanese boxer nga si Yukinori Oguni maskin nga nagtapos sa technical draw sa 4th round ro andang hampang.
Raya ro naging pag-analisa ni Bombo International Correspondent Josel Palma it Tokyo, Japan matapos nga nakaangkon imaw it kahigayunan nga matan-aw it live ro hampang it daywa sa Ariake Arena sa Koto-Ku sa nasambit nga nasyon.
Suno kana, nagtapos sa draw ro hampang it daywa matapos nga makaangkon it nina si Oguni sa accidental headbutt sa andang junior featherweight fight.
Ro daywang judges hay pumabor kay Casimero sa score nga 29-28 samtang ro ikatlong judge hay pumabor kay Oguni sa parehas nga score kat ginpundo it referee nga si Yuji Fukuchi sa 27 second it ika ap-at nga round.
Raya ro unang draw sa record it 34-anyos nga si Casimero matapos ro siyam nga magkasunod nga anang pagdaog.
Ro dating IBF junior flyweight, IBF flyweight ag WBO bantamweight titleholder halin sa Ormoc City hay may record eon makaron nga 33 nga daog, ap-at nga pyerde, sangka draw nga may 22 knockouts samtang ro 35-anyos nga isi Oguni hay may 21 daog, daywang pyerde, tatlong draw nga may waeong knock outs.
