KALIBO, Aklan — Bilang preparasyun sa aktwal nga pagpasueod ag pagpagowa it mga pasahero sa tiempo it pagpasara sa isla it Boracay sa Abril 26, magapatigayun it dry run makaron nga adlaw sa ID system ro pamunuan it Caticlan jetty port.
Suno kay Caticlan port administrator Niven Maquirang, umpisa makaron nga adlaw hay maga butang sanda it one stop shop agud masabat ro mga isyung may kaangtanan sa entry ag exit it mga residente, trabahador ag mga katapo it media sa isla it Boracay.
Kaparte sigon ro ID system it naga padayun nga preparasyun para sa pagahiwaton nga rehabilitasyon sa isla.
Gin pahayag ni Maquirang nga ro mga residente it Boracay hay kinahangeang magpakita it barangay ID cards sa pag agi sa Caticlan ag Cagban ports samtang ro mga empleyado hay pagataw-an it hasta it Abril 25 agud makabo-oe it terminal identification pass.
Ro mga estrangherong residente sa Boracay ay iga paidaeum sa validation it Bureau of Immigration and Deportation bago pasugtan nga makasueod sa isla samtang, ro media coverage hay paga pasugtan engkasong may accreditation ag may oras ro pagtinir idtu.
Sa pihka nga parte, ro schedule para sa baruto ag ferry boats umpisa sa Abril 26 hay alas-6:00 it agahon hasta it alas-6:00 it gabie para sa mga residente ag trabahador ag ro night navigation nga alas-6:00 hasta alas-10:00 it gabie hay para eamang sa mga residente it isla.
Ro mga miyembro it Philippine National Police, Philippine Navy ag Philippine Coast Guard ro magabantay sa daywang pantalan samtang gina patuman ro closure order.
