KALIBO, Aklan—Indi magapataas it pamasahe ro Caticlan‐Boracay Transport Multi‐Purpose Cooperative (CBTMPC) maskin nga ginpasugtan eon ro 100% seating capacity sa idaeum it Alert level 1 ukon New Normal.
Suno kay Godofredo Sadiasa, Chairman it CBTMPC nga nagapabilin nga 50 pesos ro andang pamasahe patabok sa Isla it Boracay ag pabalik sa Caticlan jetty port.
Ko buean suno kana it enero hay nagpatuman sanda it fare increase halin sa 40 pesos hay gin-obra nga 50 pesos agud nga makasabat sa nagatinaas nga presyo it krudo ag obligasyon it andang kooperatiba sa banko sa andang ginbakae nga mga baroto nga himo sa fiberglass, kabaylo it gin-phase-out nga barotong de-kahoy kamana man ro iba pang baeayran partikular sa BIR kun sa siin sambilog sanda sa mga mabahoe nga contributor.
Apang ko nagtaliwan eamang nga buean it pebrero nanda raya ginpatuman.
May kabilugan suno kana nga 27 ro andang nagabiyahe makaron nga fast craft nga ro kada sambilog hay nagabalor it 6 to 9 milyon pesos.
Gindugang pa ni Sadiasa nga nagatau man sanda it napueong piso nga discount sa mga aklanon tourists kamana man sa mga may ginabuytan nga discount cards nga gin-isyu it andang kooperatiba.
Ginpamilit pa ni Sadiasa nga ro pagpataas it pamasahe hay aprubado it Maritime Industry Authority sa Iloilo City.
Sa pihak nga parte, ginpabugae man it CBTMPC nga maskin nga nakaangkon it pandemya hay owa sanda nagbawas it mga tawuhan ag nagaeaum nga magadere-deretso eon ro andang pagbawi sa uman nga pagbuhos it mga turista eabi eon it mga foreign tourists.
Ro 25 pesos suno kana hay dating pamasahe ko 2020 ukon antes ro pagtama it pandemya.
