Nagapabilin ro panindugan it Caticlan Boracay Transport Multi-Purpose Cooperative (CBTMPC) nga uwa sanda naila nga mabutangan it tulay maghalin sa Caticlan port patabok sa isla it Boracay.
Suno kay CBTMPC consultant ag Nabas SB member Godofredo Sadiasa, makatlong beses eon imaw nga nakaantendir it pueong nga ginpatawag it San Miguel Holidngs Corporation nga sanda ro kumpanya nga nagaduso ag nagamanehar it proyekto nga maipatuman eagi.
Ginpaathag ni Sadiasa nga maabo ro dapat nga ikonsidera sa pagpatindog it tulay bangud nga base sa andang gin-istoryahan, plano it San Miguel Holdings Corporation nga mabawi ro anang investment sa sueod it 30 anyos.
Ginatan-aw sigon it mga naga-oppose sa tulay nga mabahoe raya nga kalugihan sa mga bangkero ag posibleng makaangkon it delay sa pagtabok it mga bisita bangud nga kinahang-ean ro maid-id nga inspection ag ro baeayran sa pag-agi sa andang terminal.
Dugang pa ni Sadiasa, kon sumahon ro masobra sa P8 bilyon pesos nga pondo sa pagpatindog it tulay kinahang-ean nga kumita kara ro kumpanya sa nagaabot sa P20 milyon kada buean agud nga mabawi ro andang investment sa sueod it 30 anyos.
Masyado sigon nga maeawig ro 30 anyos para kanda nga nagasalig ro pangabuhian sa pagiging bangkero rason nga hugot sandang nagapamaeabag nga mabutangan it tulay patabok sa isla it Boracay.
