KALIBO, Aklan–Ginpaathag it pamunuan it Ceres Bus Terminal nga owa sanda it igapatuman nga adjustment sa panueoktan it pamasahe sa tunga it ginaeauman nga pagbuhos it maabu nga pasahero sa Semana Santa.
Ginpahayag ni Arnel Francisco, dispatser it Ceres Bus Terminal sa Brgy. Estancia, Kalibo nga nagapabilin sa P280 pesos ro andang panuektan sa ordinary bus halin sa Kalibo paadto it Iloilo vice versa samtang P330 man sa airconditioned bus.
Padayun man suno kana ro andang pagtao it diskwentro sa mga senior citizen, PWD ag mga estudyante.
Suno kay Francisco, padayun nanda nga ginasunod ro seating capacity it kada bus para mapabilin nga euwas ro kada pasahero eabi pa ag nagapabilin ro paeag it COVID-19 pandemic.
Mag-euwas kara, ginapatuman man sa terminal ro “No vaccine, no ride” policy.
Eauman eon sigon it mga biyahero nga makaangkon sanda it pagbag-o sa schedule it biyahe sa maabot nga Biyernes Santo samtang sa Sabado de Gloria hay magabalik man sa normal ro andang pagbiyahe.
Sa makaron, nagapabilin nga normal ro numero it mga pasahero nga nagabiyahe.
