KALIBO, Aklan— Naipanupod eon ni Pangueong Rodrigo Duterte kaibahan si Department of Agrarian Reform (DAR) Secretary John Castriciones sa 44 ka mga Ati tribe families ro Certificates of Land Ownership Award (CLOA) nga ginakaeakipan it 3.2 hectares nga eogta sa isla it Boracay.
Gintambungan it mga katutubong Ati, sambilog sa mga ginakabig nga kauna-unahang nag-istar sa isla ro seremonyas nga ginpatigayon sa Manoc-manoc Covered Court, adlaw it Huwebes, Nobyembre 8, 2018.
Sa diskurso it Pangueo sa tunga it mga Ati tribe, ginpaandaman ro mga raya nga bawae ibaligya ro nasambitang eogta hasta nga uwa pa raya napaumwad para sa masunod nga henerasyon.
Katuyuan sigon it Pangueo nga kon mag-abot ro tyempo nga kon pwede eon raya ibaligya hay dapat sa mabahoe nga kantidad para mapuslan it andang mga onga ag mahambae nga may Ati eon nga manggarunon sa nasambitang isla.
Dugang pa kara nga maswerte sigon sanda bangud bukon it tanan nga kaparehas nanda hay mataw-an it oportunidad nga makaangkon it kaugalingong eogta.
