KALIBO, Aklan–Hugut nga pagbantay ag seguridad ro ginapatuman it mga tawuhan it Coast Guard Station (CGS)-Aklan para masiguro ro kaeuwasan it mga delegado nga naga-atender sa Association of Southeast Asian Nations (ASEAN) 3rd Digital Ministers Meeting (ADGMIN) ag ASEAN Digital Senior Officials (ADGSOM) sa isla it Boracay.
Suno kay Senior Chief Petty Officer Dominador Salvino, Deputy Station Commander it CGS-Aklan nga nakakalhit makaron sa nagkaeain-eain nga deployment ag arrival area it mga ministro ro andang personnel.
Nauna eon sigon sanda nga nagpatigayun it clearing sa mga lugar nga paga-agyan it mga bisita halin sa Caticlan Airport paadto it Caticlan Jetty Port kamana man nga gina-eskortan sanda paadto it shoreline it Boracay.
Angot kara, owa man sigon sanda it nailistang anumang problema sa pag-abot it mga delegado.
Sigidas man sigon ro andang pagpatigayun it seaborne patrol sa area kung siin nagatinir ro mga bisita.
Nasayuran nga nag-umpisa eon ko adlaw it Lunes, Pebrero 6 ro nagkaeain-eain nga aktibidad nga magabuhay hasta Pebrero 10 sa pagpanguna it Department of Information and Communications Technology (DICT).
Sa pihak nga parte, ginaeauman nga may maga-abot pang mga minister makaron nga adlaw hasta hin-aga.
Ginabuebanta nga naga-abot sa 150 nga mga delegado halin sa napueo nga ASEAN member states ro magatambong sa pueong.
Tuyo kara nga pabaskugon ro digital skills ag digital transformation it mga ASEAN member states.
