KALIBO, Aklan—Nasueod eon it peste nga fall army worm ro ibang kabanwahanan sa probinsya it Aklan.
Suno kay Salome David it Office of the Provincial Agriculture (OPPA), nakaabot eon sa mga pananom nga kamaisan sa banwa it Altavas, Libacao, Banga, Malinao, Kalibo, Madalag, Numancia ag Ibajay ro nasambitang peste.
Bilang mitigating measure suno kana hay anda nga ginlaygayan ro mga mangunguma nga magpatigayon it community chemical spraying agud nga makontrol ro pag-abo it peste.
Ginpaathag nga kapin sa 353 plants species ro pwede nga kan-on it peste ag makaeopad raya it kapin sa 200 kilometers bangud nga makasurvive imaw sa hangin kamana man nagadapo sa mga iwag.
Ro ueod suno kana ro pinakadelikado nga stage it peste bangud nga nagabuhay raya it 30 diyas ag ro mismong ginakaon kara hay ro pinakapuno it tanom ukon ro alibutod mismo it mais.
Mag-eowas sa pagspray it chemical, pwede man sigon nga maggamit it katumbae ukon badjawan nga imaw ro gamiton sa pagspray sa nasambitang peste bangud nga napamatud-an eon nga maka-kontrol raya sa pag-abo it fall army worm.
Engkaso suno kana nga magapadayon ro pagpameste it fall army worm hay magatuga raya it kalugihan sa mga mangunguma ag magasangkiri ro produksyon it mais.
Kamana man, kon uwa eon ro mga raya it makaon nga mais hay magasaylo ro mga raya sa paeay ag mga tinuean-on.
