KALIBO, Aklan—Magaarangkada eon ro sangka nationwide supplemental immunization campaign para mabakunahan ro mga onga kontra sa tigdas, rubella, ag polio.
Suno kay J-Lorenz Dionisio, Nurse III it Aklan Provincial Health Office nga raya hay sangka month-long activity it Department of Health ukon DOH ag World Health Organization ukon WHO.
Ginpaathag ni Dionisio ro importansya it “Chikiting Ligtas 2023” sa pagta-o it impormasyon ag pag-engganyo sa mga onga nga magpabakuna kontra sa mga sakit nga padayon nga naga-iral sa nasyon.
Tuyo kara nga protektahan ro mga inonga halin sa vaccine-preventable diseases ag kaeakip eon kara ro measles, rubella, ag polio.
Target nga mabakunahan ro mga una sa 9 hasta 59 months old kontra sa measles, samtang zero hasta 59 months old mat-a ro pagabakunahan sa polio.
Kinahang-ean suno kana nga mataw-an it access sa life-saving vaccines ro mga inonga sa nasambit nga edad agud nga malikawan ro mga nasambit nga sakit nga posibleng makata-o it malala nga infection sa eawas it onga.
Sa pihak kara, ginpasiguro ni Dionisio nga eowas ro nasambit nga mga bakuna bangud nga mabuhay eon nga panyempo raya nga ginagamit sa Pilipinas.
Uwa suno kana it dapat nga kabaeak-an ro mga ginikanan bangud nga ginakabig raya nga booster dose sa mga nauna eon nga bakuna nga nabaton it andang mga inonga.
Bangud kara, gin-engganyo ni Dionisio ro mga ginikanan nga pabakunahan ro andang mga inonga nga maga-umpisa eon sa Mayo 2 hasta sa katapusan it buean.
Makipag-angot eamang sa andang natungdan nga barangay health center para sa nasambit nga vaccination.
