Ginboue eon it China ro ginapairal nga hugot nga restriksiyon kontra covid-19 matapos ro pilang serye it protesta sa nagakaeain-eai nga bahin it nasyon kontra sa ginapairal nga zero-covid strategy it gobyerno nga nagtuga man sa pila nga patalsikon sa pwesto si President Xi Jinping.
Ro anunsiyo man ngara it China hay kasunod it ginpaguwa nga datus it gobyerno it China sa paghinay it andag ekonomiya bangud sa epekto it zero-covid policy.
Sa idaeom it bag-ong guidelines, ro mga asymptomatic ag mild cases it covid-19 hay posible eon mag-quarantine sa andang mga panimaeay.
Madumduman nga sa idaeom it zero Covid policy it China, ginamandatu ro tanan nga positibong pasyente nga mag-isolate sa sangka centralized government facilities.
Samtang, ro mga magabiyahe man sa mga probinsiya hay bukon eon it kinahangean pa nga magpakita it negatibong covid-19 test result nga ginboue sa sueod it 48 oras ag bukon eon ma it kinahangean pa nga magpaidaeom sa covid test pag-abot sa lugar.
