Makabig nga pinalibutan makaron ro Taiwan it puwersa armada it China kasunod it joint military exercises.
Ro war games it Chinese People’s Liberation Army (PLA) hay gin-umpisahan kasunod it kontrobersiyal nga pagbisita ni US House Speaker Nancy Pelosi sa isla ko nagtaliwan nga Martes it gabi-e.
Suno sa pilang analysts, gumamit pa ro China it andang pinaka-hi tech nga J-20 stealth fighter jets ag naglunsar sigon it conventional missiles bilang test fire.
Ginapahayag nga raya eon ro pinakamabahoe nga military drill maghalin ko 1996 crisis.
Angot kara, nag-abiso sigon ro China sa mga airline companies sa Asya nga ipaiway anay ro pagbiyahe sa palibot it Taiwan.
May an-um sigon nga areas nga gintaeana it China bilang mga “danger zones.”
Ro mga flights hay ginbawaean anay umpisa alas-12:00 it hapon makaron nga adlaw it Huwebes, Agosto 4 hasta alas-12:00 it hapon it Agosto 7.
Mag-euwas sa airspace, ro blockade sa Taiwan hay kaibahan man ro biyahe it mga barko.
Nagpaandam eon man ro Taiwan Maritime Port Bureau sa mga barko nga likawan anay ro area bangud sa delikado ro pagatigayunon nga drills it China.
Una kara, sa anunsiyo it PLA Eastern Theater Command ro andang joint maritime ag air exercises hay igapatigayon sa kaeawran ag kahawaan sa bahin it north, southwest ag southeast it island of Taiwan.
Magagamit man sigon ro mga raya it long-range live-fire shooting sa Taiwan Straits.
Nagapaathag sigon raya nga pagapalibutan ro Taiwan it People’s Liberation Army sa limang mga direksiyon.
Suno man kay Sinabi Gu Zhong, deputy chief of staff it PLA Eastern Theater Command, ro andang drills hay kaeakip ro joint blockade, sea assault, land attack ag air superiority bilang pag-ensayo sa tanan nga klase it krisis.
