KALIBO, Aklan — Narekober it ginbilog nga task force ro mga bukon it rehistradong produkto nga ginabaligya it sangka Chinese company nga may sanga sa banwa it Kalibo ag Numancia sa probinsiya it Aklan.
Suno kay P/Lt. Col. Richard Mepania, hepe it Kalibo Police Station, ginsalakay nanda ro Sea World Food Supplement sa Roxas Avenue Kalibo, apang naka-padlock eon raya.
Nabuksan raya sa bulig it tag-ana it building para sa pagahimuon nga inspeksyon, kun sa siin nakumpiska ro mga naka-karton nga bukon it rehistradong bueong kapareho it Sea Dog Pill nga sangka sex enhancer for men ag iba pa.
Base sa record it Business and Licensing Office it LGU-Kalibo, ro operasyon it nasambit nga establisimento hay ginapadaeagan sigon it mga Chinese, apang naggamit it dummy name nga nakapangaean kay Ron Taunan Teodosio it Libtong, Estancia, Kalibo.
Kaabuan sigon sa mga kliyente it nasambit nga kumpaniya hay puro mga Chinese man ag may mga distributor nga mga Pinoy.
Ginpahayag ni Mepania nga ro pagbaligya it ginabawae nga produkto hay sangka criminal offense ag may nagakaigon nga kaso ag penalidad.
Dapat sigon nga magsunod sa sueundanan it Food and Drug Administration (FDA) para sa kamaeayran it publiko.
Gindaea sa Iloilo ro mga nakumpiskang produkto para sa laboratory test.
Ro task force hay ginaeakipan it Bureau of Fire Protection, Engineering ag Local Business Licensing Department it LGU-Kalibo ag Municipal Health Office.
