KALIBO, Aklan—Kadungan it paglobo it mga turista sa Isla it Boracay hay ro pag-abo man it mga schedule flights it nagkaeain-eain nga airlines sa Kalibo International Airport.
Sa interview it Bombo Radyo Kalibo kay Civil Aviation Authority of the Philippines (CAAP) Manager Engr. Eusebio Monserate Jr., ginpahayag kara nga halin sa tig-sangka domestic ag international flight ko nagtaliwan nga Boracay closure hay nag-abot eon raya makaron sa 16 nga international ag 9 man ro domestic nga nagahugpa kada adlaw sa nasambitang paeoparan.
May kaangtanan kara, sa pinakaulihing datos it CAAP-Aklan, nakalista ro paeoparan it masobra sa 23,754 nga domestic arrival samtang, nagaabot man sa 32,620 ro international arrival nga kaeabanan hay mga Chinese ag Korean nationals nga presenteng nagabakasyon sa Boracay.
Suno pa kay Monserate, ginaeauman nandang madugangan pa it pilang libo ro influcks it mga pasahero sa nasambitang paeoparan bangud sa nagahilapit nga yuletide season ag ro pagselebrar it Kalibo Sto. Niño Ati-atihan Festival 2019 nga ginakabig nga “Mother of All Philippine Festival”.
