Ginsaueog it mga Chinese nationals sa Hong Kong ro unang adlaw it nakaangdan nga selebrasyon it Chinese New Year.
Suno kay Bombo International Correspondent Jacky Torate it Hong Kong nga ap-at nga adlaw ro pagselebrar it Chinese New Year kung siin sa unang adlaw sigon hay ro tyempo it pagtipon-tipon it mga magkapamilya sa andang mga panimaeay.
Nagapabilin man suno kana ro tradisyon it mga Chinese partikular ro pagpreparar it mga mapilit nga pagkaon ag mga sweet delecacies nga ginapatihan pangpaswerte.
Indi man sigon maduea kara ro pagpreparar it sambilog sa mga pinaka-espesyal nandang handa ro paglitson it baboy nga matsa urok eamang it kabahoe kumpara sa Pilipinas nga ro gina-litson hay mabahoe nga baboy.
Ginpahayag dugang pa kara nga sa pagtieipon it mga magkapamilya sa andang mga panimaeay hay ro pagkaon man it mga mainit nga pagkaon kapareho it hot pot bangud sa kaeamig it panyempo sa nasambit nga nasyon.
Sa pihak nga parte, kumpara sa Pilipinas nga mga bilog nga prutas ro ginatipon hay mga matam-is nga dolsi ag mga tsokolate ro ginatipon nanda nga ginabutang sa andang lamesa.
Samtang, sambilog sa mga highlights it nasambit nga selebrasyon nga ginakaeangkagan it mga residente hay ro pagperform it dragon dance sa mga kalye ag ro igapatigayon nga concert it KPOP group nga Black Pink sa nasambit nga nasyon.
