KALIBO, Aklan — Padayon pa nga ginaimbestigahan it pulisya ro pagpanakaw sa apartment it sangka turistang Chinese sa Barangay Balabag sa isla it Boracay
Sa report it Malay Police Station, ginsueod it uwa pa nakilaeang suspek ro ginarentahang apartment it biktimang si Tianqi Hong, 34, taga-China ag nagabakasyon eamang sa isla.
Natakaw sa turista ro kapin sa P200,000 cash money ag cellphone it suspek nga nakasueod sa apartment samtang imaw hay nakatueog sa anang kwarto.
Nakabugtaw sigon imaw bandang alas-7:45 it agahon bangud sa mga kaeuskos ag nataeopangdan ro uwa nakilaeang eaeaki, kung siin, gilayon nga nagpaeagyo kat ana raya nga sitahon.
Kasunod kara, nadiskubrehan it biktima nga uwa eon ro anang pouch nga may sueod nga cellphone, $2,100 ag P80,000 nga cash.
Nakita sa CCTV footage ro suspek nga ginapatihang sangka menor de edad ag miyembro it sangka grupo nga eakot sa serye it mga panakawan sa isla.
Nagapadayon pa ro imbestigasyon it pulisya sa nasambitang insidente.
