NATIONAL News — Uman eon man nga nag-abu ro presensya it mga naval ag coast guard vessels it China sa West Philippine Sea (WPS), base sa pinaka-ulihi nga monitoring it Philippine Navy.
Eakip sa na-monitor nanda ro siyam nga People’s Liberation Army Navy vessels ag 13 nga China Coast Guard (CCG) vessels nga nakit-an umpisa Agosto 6 hasta 12.
Mag-eowas kara, may daywa pa nga China Research ag Survey Vessels ro naispatan ko nagtaliwan nga domingo.
Samtang, naga-abot man sa 68 nga China Maritime Militia Vessels ro na-monitor halin sa 106 nga nauna eon nga nakita sa nasambit nga teritoryo.
Base pa sa report, ro 13 nga China Coast Guard vessels nga nakit-an sa WPS, tatlo kara hay una sa Bajo de Masinloc ukon Scarborough Shoal, lima sa Ayungin, daywa sa Pagasa Island ag tatlo man sa Sabina Shoal.
Ro siyam nga barko man it People’s Liberation Army Navy hay una sa palibot it Ayungin, daywa sa Pagasa, sambilog sa Likas Island, sambilog sa Patag Island, tatlo sa Sabina ag sambilog sa Iroquois Reef.
Dugang pa kara nga ro 68 nga China Maritime Militia Vessels nga ginaeakipan it an-um sa Bajo de Masinloc, ap-at sa Ayungin, 37 sa Pagasa, daywa sa Lawak Island, an-um sa Panatag Island ag 13 sa Sabina.
Ro daywa nga iba pang China Research ag Survey Vessels hay una sa vicinity it Patag ag Ayungin.
Nagapadayon man ro maritime patrol it Philippine Navy ag air patrol it Philippine Air Force (PAF) sa West Philippine Sea.
