Balitang Espesyal——-Nagpangayo it bulig ro sangka pamilya sa Australia matapos madiskubre ro kakaibang palamuti nga nakasab-it sa Christmas tree nanda sa baeay.
Pilang oras eamang nga naghalin it andang baeay sa Adelaide, Australia ro pamilya McCormick rason nga nakibot sanda kat dumiretso ro andang alagang ayam sa andang Christmas tree ag may ginahugum.
Suno sa 16-anyos nga si Taylah, naabutan nana nga nakakalhit ro mga palamuti sa saeog ag kat tan-awon nana ro alipunto it puno hay idtu eon nana nakita ro nakabitin nga koala.
Insigidang nagtawag ro pamilya it animal rescuers, nga ko una hay ginaeaum nga nagahinangae eamang sanda kat hambaeon nga may sangka buhi nga koala nga nakabitin sa Christmas tree it andang baeay.
Madasig nga nag abot ro rescue team ag ginbo-oe sa alipunto it Christmas tree ro koala bear nga natukiban nga sangka babaye nga naga edad it tatlo hasta ap-at nga dag-on.
Posible sigon nga nalipay eamang raya sa itsura it puno it mga McCormick rason nga nahimo kara nga sudlon ro baeay ag nagkabit-kabit sa Christmas tree.
Ginbuhian sa kaiping nga kakayuhan ro koala, nga suno sa pamilya McCormick hay pagasubaybayan eon nanda umpisa makaron.
