KALIBO, Aklan — Ginpasiguro it Department of Public Works and Highways (DPWH) nga pwede eon nga maagyan ro gina-ubrang road projects sa uman nga pagbukas it Boracay sa Oktubre.
Sa interview itBombo Radyo, ginhambae ni DPWH-Aklan district engineer Noel Fuentebella nga haeos 40 porsiyento eon nga tapos ro circumferential road sa isla.
Ku nagtaliwan nga adlaw sigon hay nagpatigayon it inspection si DPWH Secretary Mark Villar sa naga padayon nga rehabilitation works sa Boracay agod nga sayuron ro improvement kara.
Na-umpisahan eon sigon ro pagsemento ag pagbutang it mga tubo sa may bahin it Cagban hasta sa Elizalde Compound.
Ro iba pang improvements hay ro construction it road network sa bahin it Bulabog Beach nga gina-agyan makaron it mga saeakyan pasueod ag paguwa it isla samtang gina-ayos ro main road.
Gusto it DPWH nga mapaeapad ro karsada sa 12 meters nga may daywang linya, drainage, sidewalks, gutters, ag bike lane.
Sambilog raya sa mga prayoridad sa an-um nga buean nga Boracay closure.
